По осум години поминати на клупата на Ливерпул, Јирген Клоп си замина од „Енфилд роуд“. Многумина фанови на Црвените се плашеа дали тимот ќе продолжи со успешни игри и по заминувањето на Клоп. Арне Слот беше изборот за наследник на менаџерската функција и по првичните резултати, одлуката е одлична. Ливерпул игра сезона од соништата.
По четири кола одиграни во Лигата на шампионите, Ливерпул е единствен од сите 36 екипи со максимални 12 бода. Одлично му оди на Ливерпул и во Премиер лигата, каде што е лидер дури со пет бода повеќе од второпласираниот Манчестер сити.
Како што пишува англискиот весник „Сан“, Слот е единствен тренер во историјата на Премиер лигата, односно од 1992 година досега, што во првите 17 натпревари имал 15 победи. Има и по едно реми и еден пораз.
Досегашниот рекорд го држеа Карло Анчелоти и Жозе Мурињо, кои имале по 14 победи во првите 17 средби во една сезона. По 13 победи во првите 17 натпревари имале Антонио Конте, Маурицио Сари и Џон Грегори. Интересно е дека далеку на оваа листа се Пеп Гвардиола и Јирген Клоп. Гвардиола имал 11 победи во првите 17 натпревари како предводник на Манчестер сити, додека Клоп како предводник на Ливерпул бил со девет победи во првите 17 дуели.
