Фудбалска Битола е подготвена за големиот спектакл, гостувањето на Италија. Утре на реновираниот стадион „Петар Милошевски“ во Битола ќе се одигра квалификацискиот натпревар за ЕП 2027 меѓу младите селекции на Македонија и на Италија.
Стадионот блеска. Зборовите на претседателот на ФФМ, Масар Омерагиќ, се преточени во дело, нова трибина, ВИП ложа, нов оплеменет подтрибински простор, нови соблекувални и рефлектори кои ќе блеснат во полн сјај. Битола сега може да се гордее со репрезентативниот објект и ќе биде горд домаќин на младите селекции на Македонија и на Италија.
„Кога зборовите се дела! За рекордно краток рок, заедно со општина Битола успеавме да го претвориме стадионот ‘Петар Милошевски’ во гордост на Битола и дом на македонската репрезентација. Горд сум на сите што беа дел од овој процес“, објави претседателот на ФФМ, Масар Омерагиќ.
