Денеска со натпреварот меѓу Сплит и Студентски центар (18 часот) ќе започне новата сезона во регионалната кошаркарска АБА-лига во која нема да има македонски претставник.
Шампионот МЗТ Скопје, кој минатата сезона играше во АБА-лигата, беше последен 14-ти на табелата и испадна во АБА2-лигата. Нов член на АБА е словенчката екипа Крка.
И оваа сезона ќе настапуваат 14 екипи, пет од Србија, по три од Хрватска и Црна Гора, две од Словенија и една од БиХ и ќе се игра по идентичен систем, првите осум тима од регуларниот дел од сезоната во плејофот ќе ја продолжат битката за титулата.
Во плејофот ќе се игра по принципот првиот со осмиот, вториот со седмиот, третиот со шестиот и четвртиот против петтиот тим од регуларниот дел од сезоната, а пласман во полуфиналето ќе обезбеди тимот кој прв ќе дојде до две победи. Во полуфиналето исто така ќе се игра до две победи, додека големото финале ќе се игра до три триумфa.
Апсолутни фаворити за пласман во големото финале и завршната битка за трофејот се белградските вечни ривали Партизан и Црвена ѕвезда, кои и минатата сезона играа во финалето (Партизан славеше со 3-2 во победи).
И двата тима доста се засилија летово бидејќи амбициите им се многу поголеми од АБА-лигата, тие целат кон пласман на завршниот турнир во Евролигата.
Партизан иако остана без Матијас Лесор, Данте Ексум, Јам Мадар и Јоанис Папапетру, ги донесе Матеуш, Понитка, Огњен Јарамаз, Пи Џеј Дозиер и Фред Камински, а најавени се уште две засилувања. Управата исто така заврши голема работа со тоа што успеа да ги задржи Пантер, Нанели, Ледеј, Анѓушиќ, Аврамовиќ, Копривица, Трифуновиќ и Вукчевиќ, кои потпишаа нови договори.
Нивниот голем ривал, Црвена ѕвезда, направи целосен ремонт на тимот и со ангажирањето на доста звучни имиња стана фаворит за пласман на завршниот турнир во Евролигата, а со тоа и фаворит заедно со Партизан за триумф во АБА-лигата. Црвено-белиот дрес летово го задолжија Милош Теодосиќ, Јаго дос Сантос, Жоел Боломбој, Рокас Гедраитис, Шабаз Нејпиер, Мајк Тоби, Немања Бјелица, Адам Ханга, Дејан Давидовац и Марко Симоновиќ.
Својата шанса од заднина ја гледаат Цедевита Олимпија и Будуќност, кои исто така видливо се засилија, но за сè ќе се прашуваат белградските вечни ривали.
