Стеф Кари беше незапирлив во дуелот против Денвер нагетс и го предводеше Голден стејт до победа од 116:107. Првата ѕвезда на воините даде 53 поени, а посебно блесна во првата четвртина кога даде дури 21 поен.
На една минута и 40 секунди до крајот од првата четвртина, Кари постигна поени со кои испиша нов рекорд во клупската историја на Воините. Шутерот успеа да го надмине рекордот на легендарниот Вилт Чемберлен, кој досега беше најдобар стрелец во историјата на клубот. Чемберлен имаше 17.783 поени, а Кари од ноќеска веќе ја има надминато и границата од 17.800 поени во дресот на Голден стејт. Шутерот даде дури 10 тројки.
Клучната предност домаќините ја направија во третата четвртина, која ја добија со 43:22, па последните 12 минути беа само формалност. Никола Јокиќ беше прв стрелец кај Денвер. Србинот заврши со 27 поени, а имаше и 12 скока и осум асистенции.
Резултати од мечевите одиграни ноќеска во НБА: Далас – Филаделфија 95:113, Њујорк – ЛА лејкерс 111:96, Орландо – Сан Антонио 97:120, Мемфис – Чикаго 101:90, Њу Орлеанс – Сакраменто 117:110, Јута – Вашингтон 121:125, Голден стејт – Денвер 116:107, Феникс – Хјустон 126:120.
