Чешката ракометна репрезентација нема да се откаже од настапот на Мундијалот во Египет што ќе почне на 13. јануари, па ниту алатмантната ситуација со дури 16 играчи позитивни на Ковид-19 не ги пишмани Чесите.
„По секоја цена ќе играме на Мундијалот. Ситуацијата не е добра со позитивните тестови кај многу ракометари, но имаме информација дека ИХФ веќе им дозволила на две репрезентации да го прошират списокот на играчи поради Ковид-19. Чешка сигурно ќе игра на Светското првенство“, објавија од таборот на Чешка.
Со тоа и шансите на Македонија како резерва да се протне на Мундијалот во Египет речиси изчезнаа, бидејќи и втората селекција Шведска што „виси“ поради големи проблеми со Ковид-19 нема да се откаже, ако ИХФ дозволува да се прошири списокот со нови ракометари.
Македонија е прва резерва за настап на Светското првенство, откако и кај нас корона-вирусот директно ни ги одзеде шансите за пат во Египет, бидејќи бараж двомечот со Франција не се одигра со одлука на ИХФ.
