Јусуф Мукоко, фудбалерот на младинската школа на Борусија Дортмунд, слободно може да размислува за пензија на свои 14 години. Тој веќе е милионер, иако има уште време да се докажува и допрва да избие во сениорскиот тим на „милионерите“. Мукоко е еден од најталентираните фудбалери во светот на негова возраст, а тоа го забележа компанијата за спортска опрема „Најки“.
Имено, Мукоко се обврза на 10-годишен договор со американскиот спортски бренд, според кој ќе заработи 10 милиони евра. Знаејќи колкаво влијание има „Најки“ во фудбалот, но и во другите спортови, оваа сума за нив е ситно. Таа може да се зголеми со текот на годините ако Мукоко ги оправда средствата и прерасне во фудбалер каков што се очекува.
Во Германија велат дека Мукоко е следната ѕвезда која ќе го покори фудбалскиот свет, настапува за екипата на Дортмунд до 17 години, а на 49 натпревари има неверојатен учинок од 76 погодоци. Негов ментор е Пјер-Емерик Обамејанг, односно му беше ментор додека Габонецот играше во Бундеслигата, а и до денес ги слуша неговите совети како да стане подобар голгетер.
