Триумфот на Ливерпул против Шефилд јунајтед значеше место во историјата за овој тим на Црвените бидејќи заокружи цела година без пораз во Премиер лигата. Ливерпул не загубил лигашки меч од 3 јануари 2019 година наваму и тоа е серија од 37 меча (32 победи на 37 меча) во кои собраа дури 101 бод од можни 111.
Екипата на Јирген Клоп е третата по ред, по Арсенал, кој 49 меча по ред и Челзи од октомври 2004 до ноември 2005 немале пораз цела година. Ливерпул во 2019 губеше и по еден меч во ФА купот и Карабао купот. Имаше порази и во Лигата на шампионите, но во првенството е незапирлив.
Иако една година нема пораз во Премиер лигата, Ливерпул не освои никаков домашен трофеј. Пехарите од ЛШ, Суперкупот на УЕФА и Светското клупско се интернационални.
Ливерпул во последната година собра 101 бод, девет повеќе од ривалот Манчестер сити, а 35 или повеќе од сите други премиерлигаши. Со ненормалниот скор досега, Ливерпул е на добар пат сезонава да ја заврши со повеќе од 100 бода и да го урне рекордот на Сити. Ако продолжи вака, Ливерпул ќе дојде и до неверојатни 110 бода, што би било нов европски рекорд.
Триото Фирмино-Мане-Салах е ударната игла, срцето на тимот, никој други освен нив тројца нема повеќе од шест гола.
ЕВРОПСКИОТ РЕКОРД УШТЕ Е ДАЛЕКУ
Ливерпул не знае за пораз цели 365 дена, но далеку е од достигнувањето на Милан, кој од мај 1991 до март 1993 немаше пораз во Серија А. Легендарниот тим на Милан предводен од Холанѓаните Ван Бастен, Гулит и Рајкард имаше 58 меча по ред без пораз и 672 дена без пораз. За да го стигне рекордот на Милан, Ливерпул треба да остане непоразен до 5 ноември. Но, тоа е рекорд во Топ 5 лигите.
Стеауа од 1986 до 1989 година одигра 119 домашни меча, од кои 104 лигашки, и немаше пораз, а најдолгата серија од 1.959 дена (повеќе од пет години) без пораз е на тим од Гибралтар.
Ако ја завршат сезонава без пораз, ќе го надминат Арсенал, кој 539 дена не знаеше за пораз.
Ваква серија без пораз, а да останале без титула, имале само Реал Сосиедад и Перуџа. Перуџа цела сезона во Серија А во 1978/79 немаше пораз, но титулата ја освои Милан, кој таа сезона имаше три порази, но повеќе победи.
