Консултациите на Кошаркарската федерација на Македонија со десетте прволигаши, очекувано, само ја замрсија ситуацијата околу судбината на кошаркарската прва лига.
Од КФСМ велат дека по реализираното гласање по електронски пат, раководството на Федерацијата ќе поднесе конкретен предлог до Управниот одбор.
Поради неможноста да се одиграат кошаркарските натпревари од Првата лига-мажи за сезоната 2019/20, КФСМ даде два предлога за начинот на завршување на натпреварувањето.
Прв предлог е согласно моментната табела по 17 одиграни кола, да се прогласи КК МЗТ Скопје Аеродром за шампион, со испаѓање на двата последни клуба од Прва лигамажи (МЗТ Уни Банка и Вардар). Втор предлог беше да не се прогласи шампион, со тоа што нема да има испаѓање.
По електронски пат беше реализирано и гласањето од страна на клубовите учесници во нашето најквалитетно кошаркарско натпреварување. КК Работнички, Гостивар, Вардар и Куманово 2009 се произнесоа да не се прогласи шампион, три клуба: МЗТ Скопје Аеродром, МЗТ Скопје Уни-Банка ФМП Академија се изјаснија за предлогот МЗТ да се прогласи за првак, додека Еуро Никел, Кожув и Пелистер биле воздржани.
Согласно резултатот на ова гласање, раководството на Федерацијата ќе го формулира дефинитивниот предлог и ќе го стави пред членовите на Управниот одбор, кој треба да ја донесе конечната одлука за заклучување на натпреварувањето во Првата лига-мажи за сезоната 2019/20.
