Во пресрет на утрешното (17:30 часот) дерби против Тотенхем, дефанзивецот на Ливерпул Вирџил Ван Дајк посочи дека цела одбранбена линија на „црвените“ е заслужна за фактот што имаат најдобар биланц во однос на останатите екипи кога станува збор за бројот на примени погодоци во Премиер лигата.
По 31 натпревар, Ливерпул е прв на табелата со 76 бода, а покрај тоа што имаат втор најдобар напад во лигата (70 гола), ја имаат и најцврстата одбрана со само 18 погодоци примени во својата мрежа, додека Алисон Бекер во 17 наврати успеа да ја сочува мрежата, што е овосезонски рекорд.
„Мојата позиција е таква што во моменти кога добро ни оди лесно е да се каже дека јас сум човекот кој ги исправа грешките во одбраната. Но, кога работите не де движат во наша корист, ја сум првиот кого го обвинуваат. Затоа, не може да се каже дека јас ја држам дефанзивната линија, за добриот учинок сите се заслужни бидејќи секој максимално ја одработува својата задача кога треба да се браниме“, истакна Ван Дајк.
Трката за шампионската титула во Премиер лигата влегува во клучниот период, до крајот остануваат уште седум натпревари, а Ливерпул и Манчестер сити ги двојат само два бода на врвот на табелата, со тоа што актуелниот англиски првак има и натпревар помалку.
