Видео технологијата ќе дебитира и на првенството на Јужна Америка, како една од новините на популарната Копа Америка која се игра во Бразил.
Дванаесет репрезентации и 276 фудбалери ќе бидат во акција во наредните 24 дена во битка за трофејот на Копа Америка, натпреварување кое почнува утре во 2.30 часот по полноќ, со мечот Бразил – Боливија, а прв судија кој ќе може да користи ВАР е Аргентинецот Нестор Питана.
Со ВАР, судиските грешки се сведуваат на минимум, а со тоа и се доаѓа до поправични исходи на некои мечеви. Судиите на Копа ќе може да гледаат за некоја ситуација дали е гол или не, дали имало пенал, дали треба да покажат црвен картон и да проверат дали картон евентуално му е доделен на погрешен играч.
Освен воведување на ВАР, внимание привлекува и отсуството на повредениот Нејмар кај Бразилците, но и други селекции имаа проблеми со повреди на своите главни ѕвезди, како Луис Суарес кај Уригвај и Алексис Санчес кај Чиле, но тие двајца ќе играат. Аргентина ќе се обиде на терен на најлутиот ривал да дојде до првиот трофеј после пауза од 26 години, и да се изедначи со Ургвај на листата на најуспешни земји на Копа Америка.
