Ракометарите на Вардар го задржаа максималниот ефект во ракометната Супер лига и успеаја да победат на тешкото гостување во Охрид со 26-28. „Црвено-црните“ имаат ефект од 14 победи на 14 натпревари и сега имаат +3 пред Еурофарм Пелистер во пресрет на мечот на битолчани против Алкалоид.
Вардар отвори одлично и брзо дојде до водство од 1-4, а на почетокот од 19-тата минута првпат дојде до максимални пет гола разлика, 6-11. Истата предност „вардарци“ ја имаа и на 7-12 и 8-13, а Охрид во финишот од првото полувреме со одлична игра успеа да намали на 13-14 и со минимална негатива да замине на паузата.
Во второто полувреме слична слика на теренот. Вардар го започна вториот дел одлично и по само десеттина минути ја врати предноста од пет гола разлика, која успеваше да ја одржи се до последните пет минути од мечот, но охриѓани се што направија е да намалат на два гола разлика во последниот напад од мечот.
Најефикасен на мечот беше Дмитро Хориха со осум гола, два повеќе од Митровиќ и Кавада. Во поразената екипа се истакнаа Стрмљан, Иванковиќ, Крсманчиќ и Ѓукиќ со по пет гола.
