Жоао Феликс има запазена улога во тимот на Барселона сезонава. Португалскиот репрезентативец одигра 34 меча во сите натпреварувања и постигна девет гола, што доволно покажува дека е важна алка во составот.
Феликс јавно вели дека неговата желба е да остане во Барселона и следната сезона, но сепак тоа не зависи само од него. Офанзивниот играч сезонава игра како позајмен играч во каталонскиот гигант, и тоа од тимот на Атлетико Мадрид, каде што не добиваше шанса да го покаже својот квалитет.
„Мојата позиција е јасна, сакам да останам во Барселона. Со сигурност ќе се радувам ако останам тука. И семејството ми е среќно тука. Сепак, не зависи само од мене. Ќе видиме што ќе се случи, но јас сакам да играм на „Камп ноу“. Би сакал и тренерот Чави да го промени мислењето и да остане тука и за наредната сезона. Тој е одличен тренер и има одлични идеи“, вели Феликс.
Португалецот е дел од Атлетико Мадрид од 2019 година, а една година помина и како позајмен играч во Челзи.