На денешната прес-конференција по повод дуелот на Италија и Македонија, повратникот во италијанскиот национален тим, плејмејкерот Жоржињо, рече дека не се плаши од изведување пенал ако судијата досуди најстрога казна за Аѕурите.
Бразилецот со италијански пасош претходниот пат кога играше на римскиот „Олимпико“, на средбата со Швајцарија утна пенал во финишот и таа утка скапо ги чинеше, останаа без пласман на Мундијалот во Катар. Да дадеше гол тогаш, Италијанците ќе обезбедеа место на СП и немаше да мораат да играат бараж во којшто беа шокирани од Македонија во Палермо.
„Спалети добро ме прими, задоволен сум што ме врати во репрезентацијата. Мотивиран сум. Ако има пенал, ќе го шутнам, нема да се повлечам. Не се плашам, подготвен сум да преземам одговорност“, вели Жоржињо.
Играчот на Арсенал рече дека Италија не смее да прими гол против Македонија.
„Очекувам Македонија да биде затворена и компактна и меч без многу голови. Верувам дека важен фактор е да не примиме гол. На последните два меча, од два шута примивме два гола против нив, не смее да се повтори тоа“, изјави Жоржињо.
