Шпанскиот тенисер Карлос Алкарас во полуфиналето на Мастерсот во Синсинати ќе игра против Германецот Александар Зверев.
Алкарас по голема битка славеше против Русинот Андреј Рубљов. По два часа и 17 минути спектакуларен тенис, вториот играч на светот победи со 2-1 во сетови (6-3, 4-6, 7-5).
Алкарас го отвори мечот моќно, со два брејка брзо стигна до водство од 1-0 во сетови. Сепак, Рубљов, кој е 11-ти на АТП-листата, се разбуди во вториот сет. Со агресивна игра и брејк во седмиот гем, успеа да израмни на 1-1.
Одлучувачкиот сет донесе вистинска драма. Алкарас прв стигна до брејк и поведе со 5-3, но Русинот не се предаде, возврати со два гема по ред и израмни на 5-5. Токму тогаш Шпанецот покажа зошто е меѓу најдобрите: најпрво го одбрани својот сервис, а потоа искористи двојна сервис грешка на противникот за конечен триумф.
Александар Зверев немаше проблеми да го совлада Бен Шелтон со 2-0 во сетови. Тој и во двата сета славеше со идентични 6-2 во гемови.
