Најголемото индивидуално фудбалско признание вечерва ќе заврши во рацете на фудбалерот кој се покажа во најдобро светло во 2019 година. За некои тоа треба да биде Лионел Меси, а останатите веруваат дека Вирџил ван Дајк заслужува да биде само вториот стопер по Фабио Канаваро кој ја дофатил Златната топка.
Наводно, победникот веќе е познат. Се чини дека Меси ќе додаде шеста Златна топка во колекцијата и ќе има една повеќе од Кристијано Роналдо. Гласовите веќе се избројани и Меси има најмногу, зад него е холандскиот џин, а на трето место е соиграчот на Ван Дајк и ѕвездата на Ливерпул, Мохамед Салах.
Сепак, Ван Дајк смета дека вечерва никој нема да се чувствува како да загубил, без разлика во чии раце ќе оди престижната награда.
„Никој не е „лузер“, сите се горди и благодарни што се сместени во посебната класа на играчи. Самиот факт што сум во конкуренција за Златната топка го потврдува мојот труд со кој придонесов за клупски и репрезентативен успех. За брзо ќе дознаеме кој е најдобар“, истакна Ван Дајк.
Новитет во однос на претходните години е што сега не се обелоденети тројцата финалисти, па на гала-церемонијата која вечерва ќе се одржи во Париз ќе присуствуваат најголемите „фаци“ од фудбалската сфера, но не и Роналдо, а ќе го нема ниту Лука Модриќ, минатогодишниот освојувач.
