Играчите на Лион вечерва од 21 часот ќе играат со дресовите што ги носеа популарните Лавици од истото фудбалско семејство, во женското финале во Лигата на шампионите против Волфсбург и ја освоија седмата европска титула.
На сините дресови со жолти нијанси ќе има и посебна посвета. Секој играч на Лион ќе има на дресот по едно име од шампионскиот состав на женскиот тим и зборот „браво“ до него.
Дамите од Лион апсолутно доминираат на европската сцена и победуваа во последните пет изданија во Лигата на шампионите, а со 7 пехари се рекордерки, пред германскиот тим ФФЦ Франкфурт со четири трофеи.
На 30. август на легендарната „Аноета“ во Сан Себастијан го победија Волсфбург со 3:1 и ја заокружија петката трофеи во серија.
И машкиот тим на Лион играше одлично во Лигата на шампионите и стаса до полуфиналето, каде загуби со 0:3 од сега веќе актуелниот европски првак Баерн Минхен.
Мечот со Ним се игра вечерва од 21 часот во Лион.
