Јувентус се насочи кон аргентинскиот интернационалец од Фиорентина, Николас Гонзалес, јавуваат италијанските медиуми. „Бјанконерите“ имаат потреба од нов играч на крилните позиции, бидејќи Федерико Киеза не е во плановите на новиот тренер Тијаго Мота и се очекува да биде продаден.
Според информациите, Јувентус предлага да го земе 26-годишниот Аргентинец првично на заем, со обврска за купување по завршувањето на сезоната за сума од 30 милиони евра. Можно е во договорот да биде вклучен и некој од играчите со кои торинскиот гигант сака да се раздели, како Филип Костиќ или Вестон Меккени.
Преговорите помеѓу двата клуба продолжуваат, а Нико Гонзалес не е вклучен во тимот за денешниот пријателски натпревар на Фиорентина против Фрајбург.
Нико Гонзалес минатата сезона беше еден од најдобрите во италијанското првенство, постигнувајќи 16 гола и забележувајќи пет асистенции во 44 натпревари за Фиорентина.
