Нерешениот резултат на гостувањето кај Мајорка на стартот на новата сезона во шпанската лига се смета за кикс на Реал Мадрид и веднаш почнаа критиките кон ѕвездениот состав на тренерот Карло Анчелоти.
Реал во 2007 и 2008 за последен пат две сезони по ред ја освои титулата во Шпанија, а последен тренер кој има две титули во низа во Ла Лига со Реал е Лео Бенхакер од пред 35 години, па пред Анчелоти е сериозен тест и му претстои голема борба.
Историјата покажува и дека Реал 20 пати ја почнал сезоната со нерешен резултат и само петпати во тие 20 сезони на крајот станал и првак, последен пат во 2006/2007 со Фабио Капело на клупата.
Ако Реал не го одбрани трофејот, „виновна“ ќе биде и ждрепката. Да се гостува кај Мајорка во прво коло, е голем малер, без разлика дали ќе победите, ќе загубите или ќе ремизирате. Досега никогаш титулата во Шпанија не ја освоил тим кој во првото коло имал гостување кај Мајорка.
