Јувентус второ коло по ред во новата сезона победи со 3-0, а вечерва жртва на Старата дама беше Верона, и тоа на нејзин стадион, па по две кола во италијанската Серија А, само Јуве има максимални 6 бода и е лидер на табелата.
Душан Влаховиќ постигна два гола и беше предводник на некомплетниот Јуве. Србинот има 24 години, а веќе седма сезона по ред дава голови во италијанската лига. Во последните шест сезони, ниту еден играч нема повеќе мечеви од Влаховиќ со по барем два постигнати гола.
Вечер за паметење имаше младиот дефанзивец Николо Савона, кој на својот втор меч во кариерата во Серија А првпат даде гол.
