Денешниот меч од кошаркарската Суперлига помеѓу Кожув и Куманово не се одигра затоа што кумановци се под суспензија од МКФ, па на гевгеличани им е доделена службена победа од 20-0.
Кумановци имаат финансиски проблеми, блокирана сметка и не ја исплатија навреме првата рата од долгот кон МКФ, по што следуваше и суспензија. На последниот состанок на Здружението на прволигаши беше договорено сите прволигаши долговите да ги подмират на четири рати, а краен рок за првата рата беше 30 април.
Куманово не исплати четвртина од сумата што ја должи, по што следуваше суспензија и службен пораз од Кожув. Куманово веќе в сабота треба да игра нов натпревар, на домашен терен против Блокотехна. Ова значи дека ако до утре не платат, суспензијата ќе остане на сила, а вториот службен пораз би значел и автоматска преселба во понизок ранг на натпреварување.
