Реал Мадрид со убедливи 3-0 го совлада Валјадолид на „Сантијаго Бернабеу“. Сепак, победата не беше толку лесна бидејќи Кралскиот клуб го скрши отпорот на противникот дури во завршницата на натпреварот.
По мечот, Карло Анчелоти изрази задоволство, а посебно признание му оддаде на Феде Валверде. Уругваецот одигра феноменален меч, го постигна првиот гол на дуелот, а за Карло Анчелоти, покрај сите ѕвезди во клубот, тој е незаменлив.
„Феде Валверде е незаменлив играч. Тони Крос го одбра совршениот играч да го носи дресот со број 8“, рече Анчелоти.
Килијан Мбапе не блескаше. Промаши стопроцентна шанса, имаше уште неколку обиди, но во целина одигра скромно.
„Ќе даде гол порано или подоцна. Не му е наложено да игра како ‘деветка’. Се движи многу добро, создаде три-четири шанси. Головите ќе дојдат“, уверен е Анчелоти.
Ендрик на своето деби пред публиката на „Сантијаго Бернабеу“ испиша историја. Стана најмладиот странец кој некогаш постигнал гол за Кралскиот клуб. Анчелоти е задоволен од младиот Бразилец.
„Ендрик изгледа многу добро. Има огромен потенцијал и тоа го покажа со овој гол. Одличен е на мал простор“, посочи италијанскиот стратег.
