Холандскиот телевизиски водител Вилфред Жене ги појасни околностите околу неодамнешниот конфликт со Арјен Робен, при кој славниот поранешен фудбалер го оттурнал за време на натпревар на помлади категории. Водителот на емисијата Vandaag Inside наведува дека однесувањето на поранешниот холандски репрезентативец го изненадило и дека инцидентот не бил изолиран, туку му претходеле низа тензични ситуации.
Инцидентот се случил откако екипата на Гронинген У-14, која ја тренира Робен, загубила со 1-0 од водечката Викторија, за која настапува синот на водителот. По последниот судиски свиреж избила расправија меѓу Робен и судијата, а Жене решил да интервенира. Робен тогаш го оттурнал водителот и му одговорил: „Не мешај се.“
View this post on Instagram
Снимката од настанот предизвика неверување кај Јохан Дерксен, колега на Жене и поранешен фудбалер.
„Ти се смееш, но мене воопшто не ми е смешно кога те оттурнува рекордерот по број на настапи за репрезентацијата. Сигурно си го испровоцирал“, изјави Дерксен.
Вилфред Жене потоа откри дека тензијата започнала уште пред натпреварот.
„Беше прилично емотивно, повозрасен судија стоеше со мобилен телефон за да се фотографира со Арјен Робен. Сакаше слика, но Арјен го одби.“
Водителот го опиша и однесувањето на Робен за време на натпреварот како проблематично.
„На полувремето, при резултат 1-0 за екипата на мојот син, беше бесен поради гол-аут или корнер. Но, тој целото прво полувреме го навредуваше судијата“, раскажа Жене.
Коментаторот Рене ван дер Гијп се насмеа кога се спомена судијата.
„Па тоа е само некој човек кој во сабота од забава суди натпревар.“
Дерксен беше подеднакво изненаден од реакцијата на Робен.
„Воопшто не можам да го замислам Арјен Робен да го прави ова. Срамота е да се гледа како стои пред клупата на аматерски клуб како некој селски идиот.“
Жене тврди дека приговорите на Робен влијаеле врз судењето.
„Во првото полувреме ни беше поништен сосема регуларен гол, а не ни беше досуден ни пенал, така што можеше да биде 3-0.“
По натпреварот, вели, му пришол на Робен за да го смири.
„Му реков: ‘Не се вознемирувај толку’, а тој ми одговори: ‘Што те засега тебе тоа?’“ Првично мислел дека навредата е шега, но потоа следела и посериозна реакција.
Тој ги отфрли сугестиите дека намерно барал конфликт.
„Му пријдов бидејќи бев запрепастен од тоа што се случуваше во првото полувреме. Оној човек (судијата) беше целосно збунет и поради постојаното викање од клупата едноставно не досуди чист пенал. Во второто полувреме Робен влезе на теренот и продолжи да му вика на судијата. Навистина штета“, заклучи Вилфред Жене.
