АТП и Тениската федерација на Австралија потврдија дека ќе организираат АТП Куп, тимско натпреварување со кое ќе се отвора сезоната од 2020 година. Одлуката пристигна неколку недели по одобрувањето од страна на ИТФ да има измени во Дејвис купот.
АТП Купот ќе има награден фонд од 11,3 милиони фунти, а ќе учествуваат 24 репрезентации кои ќе бидат поделени во шест групи со по четири претставници. Тенисерите кои ќе учествуваат ќе добијат АТП бодови.
Од друга страна, Дејвис купот ќе ја затвора сезоната, а на тој турнир ќе учестуваат 18 екипи.
Претседателот на здружението на играчи, Новак Ѓоковиќ, даде поддршка на АТП Купот при претставувањето во Лондон, каде што беше најавено дека овој турнир ќе биде вовед за првиот Гренд слем, односно Отворениот турнир на Австралија, кој започнува кон крајот на јануари.
„Ми се допаѓа тоа што натпреварувањето е под „власништво“ на АТП. Австралија е земја која има Гренд слем и ја негува тениската традиција. Повеќе од 90 проценти од времето го поминуваме играјќи како индивидуалци, а овој Куп ќе соедини голем број нации, а јас ќе бидам горд што ќе можам да ја претставувам мојата држава“, истакна Новак.
