Баер Леверкузен си продолжи по својот рецепт, да победува на секој втор меч во Бундеслигата, а тоа беше добитна комбинација и вечерва против Шалке 04.
Со головите на Александар Драговиќ и на Лукас Аларио во период од девет минути во првото полувреме популарните „фармацевти“ славеа со 2-1 на „Ауф Шалке арената“.
Шалке намали со голот на Рајт во финишот на првиот дел, но потоа не успеа да ја затресе мрежата на гостите во второто полувреме и остана без победа на четвртиот меч по ред во Бундеслигата.
Двете екипи имаат скромна полусезона во германското првенство, а Баер е подобар со 21 бод на десеттото место. Шалке на едно коло до крајот на првиот дел од шампионатот е дури 14-ти, само со 15 бодови.
