Македонија Ѓорче Петров му посака топло добредојде за најновото засилување, искусниот голгетер Дејан Блажевски (33), кој по претходната соработка со екипата на Работнички, носи дополнителна свежина, цврстина и особено непроценливо искуство во нападот на популарните „лавови“.
„Македонија Ѓорче Петров е одличен тим со супер услови за работа. Доаѓам во Ѓорче да дадам максимум од моите капацитети и искуство, и да му помогнам на тимот во исполнување на претстојните предизвици, а тоа се нови заеднички успеси и што повисока позиција на табелата“ – рече популарниот Шиле.
Блажевски кариерата ја почна во Пелистер, а има играно и во грчки клубови, Турново, Вардар, Тирана и Работнички. За репрезентацијата има четири настапи и еден гол.
