Она што го направи Деклан Рајс вечерва, ќе влезе во историјата на Лигата на шампионите, даде два прекрасни гола од слободни удари и го однесе Арсенал со една нога во полуфиналето на Лигата на шампионите.
Шокот за Реал Мадрид е голем, не само поради тоа што загубија во Лондон со 0-3 туку и затоа што не веруваа дека може да им се случи ова. Рајс никогаш немаше дадено гол од слободен удар, а вечерва даде два, и тоа какви, особено спектакуларен беше вториот.
Познато е дека англискиот репрезентативец има добар шут од далечина, но тој никогаш не бил специјалист за слободни удари.
До неговото доаѓање во Арсенал, во Вест хем имаше конкуренција од Ворд-Прауз, кој ги изведуваше слободните удари, а во преселбата кај Топчиите, тој само гледаше, одговорен за слободни удари досега беше Одегард.
Сепак, вечерва Рајс почувствува дека му оди и постигна два прекрасни гола кои ќе ја одбележат неговата кариера.
