Аргентинскиот стратег Диего Симеоне би можело да го напушти Атлетико Мадрид по крајот на сезоната според информациите на „Релево“. Иако важи за најуспешен тренер во историјата на клубот, поради чувството на исцрпеност и влошените околности, Симеоне се соочува со можност за заминување.
Тој е дел од Атлетико од 2011 година, но последните промени во управата на клубот го комплицираат неговиот статус.
Новата динамика започна со доаѓањето на Карлос Букеро како директор за фудбал во јануари 2024 година. Неговото назначување доведе до значајни промени, меѓу кои и отпуштањето на спортскиот директор Андреа Берта, долгогодишен соработник на Симеоне. Покрај тоа, беа отстранети и други членови на персоналот блиски со аргентинскиот тренер, што ги заостри тензиите.
Влијанието на Симеоне во носењето клучни одлуки е значително намалено, иако претходно имаше последен збор во сите прашања поврзани со тимот. Дополнително, наводно, Букеро не го поддржал останувањето на синот на Симеоне, Џулијано, во клубот, што дополнително ги влоши односите.
Односот на Букеро со играчите се опишува како „студен“, а неговите мерки за намалување на платите дополнително ја нарушија хармонијата во тимот. Ова ги погоди играчите како Марио Хермосо, Стефан Савиќ, Алваро Мората и Мемфис Депај, кои си заминаа.
