Столе Димитриевски има малку повеќе од 300 гласови во изборот на официјалната страница на Ла Лига за играч на колото во шпанското првенство.
Гласањето сè уште е во тек, а моментно прв, и тоа убедливо е Луис Суарес, шпицот на Барселона, со над 1.500 гласови. Позицијата број два моментно му припаѓа на напаѓачот на Реал Сосиедад, Жозе Вилијан, кој беше импресивен во победата на Баските против Реал во Мадрид.
Вилијан ѝ е познат и на македонската јавност откако му даде на Вардар четири гола во Скопје во меч од Лигата на Европа.
Зад Димитриевски е Алекс Галјар од Уеска, творецот на победата на неговиот тим против Бетис.
Димитриевски веќе заслужи место во идеалниот тим на 18-тото коло, што му е второ вакво признание, а со извонредните одбрани против Валјадолид за првпат се најде во конкуренција и за МВП на колото.
Гласањето е уште во тек, а својот глас можете да го дадете ТУКА.
