Претседателот на Наполи, Аурелио де Лаурентис, предложи во фудбалот да се направат револуционерни промени. Според еден од најуспешните филмски продуценти во Италија, а од 2004 година и управител на калчолигашот од Неапол, фудбалот може да „изумре“ доколку не се смени нешто.
„Фудбалот е многу важна индустрија. Но, треба да гледаме во иднината. Зошто децата се на компјутери и играат видеоигри. Во моментов ние го уништуваме фудбалот. ФИФА и УЕФА се антики. За осум години децата ќе престанат целосно да се интересираат за фудбалот. Тоа ќе биде наша вина, затоа што ние сме стари идиоти. Мечевите се долги, приспивни. Треба да се игра едно полувреме 30 минути, потоа да има 2-3 минути пауза и потоа да се одиграат уште 30 минути“, е предлогот на Де Лаурентис.
Претседателот на Наполи истакна дека е потребно да се направи и ново натпреварување во кое ќе учествуваат само првопласираните четири екипи од најсилните пет лиги во Европа.
„Треба да се направи промена и во Лигата на шампионите. Ако се земат четирите најдобри екипи од најдобрите пет лиги во Европа, ќе се направи една лига со 20 клубови. Би се играло само еден меч, без реванш, а ждрепката ќе реши каде ќе се игра. Тие дуели би се играле во вторник и среда, а за викендите би биле дуелите од домашните шампионати“, е идејата на претседателот на Наполи.
