На 11-ти декември на трибините на најголемиот стадион во Србија, „Рајко Митиќ“ ќе биде и Новак Ѓоковиќ. Најдобриот светски тенисер е голем навивач на Црвена ѕвезда и не сака да го пропушти спектаклот и дуелот против Пари Сен Жермен од Лигата на шампионите.
Ѓоковиќ во септември присуствуваше на мечот на Ѕвезда со Радник Сурдулица, а потоа и на отворањето на АБА-лигата, кога кошаркарскиот тим на Ѕвезда играше со Цибона.
На Ѕвезда ѝ треба победа за место во Лигата на Европа, а „светците“ со три бода ќе одат во осминафиналето од ЛШ.
Новак полека почна со тренинзи и подготовки за наредната сезона, но реши да го посети Белград на 2-3 дена и да го гледа фудбалскиот меч. Тој од Монте Карло доаѓа во Белград на денот на мечот, а на трибините ќе биде заедно со браќата Марко и Ѓорѓе. По два или три дена, повторно ќе мисли само на тенисот и ќе продолжи со подготовки.
