Новак Ѓоковиќ неочекувано одигра четири сета за да го помине првото коло на гренслем-турнирот во Лондон, популарниот Вимблдон. Србинот, кој е број 1 на светската АТП-листа, славеше со 4:6, 6:1, 6:2, 6:2 против домашниот натпреварувач Џек Дрејпер.
Младиот 19-годишен Британец започна одлично и без страв против големиот фаворит, па во третиот гејм успеа да направи брејк и таа предност да ја чува до крајот на првиот сет, кој го доби со 6:4. Ова беше првпат по 2010 година Ѓоковиќ да го загуби првиот сет во првото коло од Вимблдон.
Иако го загуби првиот сет, Ѓоковиќ брзо се врати во игра и експресно го доби вториот сет со 6:1. Доминацијата на најдобриот тенисер во светот продолжи и во третиот и четвртиот сет, кои ги доби со по 6:2 и за два часа и две минути на крајот Србинот очекувано го прослави влезот во второто коло.
