Манчестер сити во трката за лидерското место во Премиер лига во следните неколку недели ќе мора да игра без најдобриот фудбалер Кевин де Бројне. Менаџерот Пеп Гвардиола на денешната прес-конференција потврди дека повредата на Де Бројне на последниот меч против Астон вила е сериозна и дека го чека подолга пауза.
„По последните прегледи, докторите рекоа дека Кевин ќе мора да паузира во следните четири до шест недели. Тој е значаен играч во нашиот тим, но ние мора да најдеме соодветно решение“, соопшти Гвардиола пред дуелот против Чалтенам во ФА купот.
И без Де Бројне, Граѓаните без многу мака треба да го поминат ова коло во ФА купот, но потоа следува борба за првото место во Премиер лигата. Сити моментно е втор со 38 бода од 18 меча, додека лидерот Манчестер јунајтед има 40 бода од 19 средби. Во следниот меч од првенството Граѓаните ќе гостуваат кај ВБА.