Тренерот на Барселона, Ханси Флик, беше задоволен по победата од 2-4 над Селта на „Балаидос“. Според него, оваа победа е многу важна бидејќи доаѓа токму пред паузата во првенството поради натпреварите на националните селекции. Сепак, тој призна дека има и некои забелешки кон своите играчи.
„Одигравме добар натпревар, а во второто полувреме се браневме подобро. Фудбалот е секогаш таков, не е важно што си направил претходно. Второто полувреме ни дава самодоверба за следните натпревари. Гледаме само кон себе. Добро вршевме притисок и задоволен сум од тимот. Ние се фокусираме на сопствената игра. Секогаш е убаво да се победи пред паузата за репрезентативните натпревари“, изјави Флик.
Тој го коментираше и настапот на напаѓачот Роберт Левандовски, кој беше најдобар на натпреварот и постигна хет-трик.
„Прерано е да се каже нешто конкретно. По повредата видов еден поинаков, позитивен Левандовски, кој се врати порано од очекуваното. Многу е добро за неговата самодоверба што постигна три гола. Тој беше многу важен за нас минатата сезона“, додаде германскиот стратег.
По хет-трикот на Левандовски и голеадата, Барселона ја намали разликата со лидерот Реал Мадрид само на три бода.
