Трите меча кои се одиграа синоќа, ја донесоа највозбудливата вечер во овогодинешниот плејоф во НБА лигата.
Лос Анџелес лејкерс и без Лука Дончиќ, славеше во Хјустон кај кој го немаше Кевин Дурант со 98-78 и со 4-2 во победи оди во западното полуфинале каде ќе се сретне со Оклахома сити тандер. На Истокот, мајсторките Детроит – Орландо и Кливленд – Торонто ќе одредат кои два тима ќе играат меѓусебе во конференциското полуфинале.
Детроит пистонс со огромен пресврт дојде до победа од 93-79 на гостувањето кај Орландо. Првото полувреме Магичните го добија со 22 поени разлика, беа на прагот на голем домашен триумф и ретка ситуација осмиот да го елиминира првиот носител, а потоа имаа невиден колапс, во цело второ полувреме постигнаа само 19 поени, во последната четвртина утнаа 23 шута по ред. Мајсторката се игра во Детроит кој сега е во психолошка предност бидејќи по 1-3, сега е на 3-3.
Драма имаше во Торонто каде Репторс по продолжение од пет минути го совладаа Кливленд кавалирс со 112-110. Кавалирс водеше со 110-109 и беше блиску до пласман во следното коло, но Ар Џеј Берет погоди тројка за победа и притоа имаше многу среќа. Шутот на Берет не беше баш прецизен, топката се одби од обрачот и летна високо до врвот на таблата, а потоа со помош на „кошаркарските Богови“ се спушти низ обрачот за огромна радост на 1,2 секунди до крајот.
RJ BARRETT HITS THE GO-AHEAD 3 IN OT TO WIN IT FOR THE RAPTORS AND FORCE GAME 7 🚨
WHAT A SHOT WITH THE SEASON ON THE LINE 😲 pic.twitter.com/FI6yKSWCaq
— NBA (@NBA) May 2, 2026
