Марко ван Бастен, холандска и светска фудбалска ѕвезда, е цел на вознемирување од страна на збунета жена. Поранешниот врвен напаѓач го потврди тоа за телевизискиот канал во својата татковина RTL Boulevard. Жената тврди и дека сопругата на Ван Бастен, Лизбет, има афера со друг маж.
„Збунета жена од Италија тврди дека мојата сопруга ме изневерува и дека е опседната од ѓаволот“, изјави Ван Бастен за RTL Boulevard. „Наводно, и моите деца се лоши и ми влијаат негативно“, пренесува дел од интервјуто весникот Het Laatste Nieuws.
Шеесет и едногодишната фудбалска легенда додава дека веќе подолго време е вознемируван од таа жена.
„Таа е во врска со ‘небесното’ и затоа смета дека е многу важно да бидам спасен од тие ѓаволски кругови во животот“, објаснува тој.
Поранешниот напаѓач на Ајакс и Милан на почетокот мирно ги прифатил овие психолошки напади, но вели дека поднел пријава во полиција.
„Но, таа оди сè подалеку и подалеку“, истакнува Ван Бастен.
Наводно, жената од Италија објавува фотографии направени во близина на куќата на Ван Бастен, на кои се тврди дека неговата сопруга Лизбет е со друг маж.
„Глупости“, вели Ван Бастен. „Јасно се гледа дека жената на фотографиите не личи на мојата сопруга.“
Марко ван Бастен и Лизбет ван Капелевен се венчаа во 1993 година и имаат три деца: Ребека, Дебора и Александар.
Ван Бастен се надева дека случајот брзо ќе биде разрешен откако пријавата е поднесена во полицијата.
„Таа е пациент кој треба да се лекува“, заклучи тој, изгледајќи смирено во интервјуто.
Марко ван Бастен е вистинска фудбалска икона од почетокот на 90-тите години, сметан за еден од најдобрите централни напаѓачи во историјата. Со Милан двапати го освои Купот на европски шампиони, претходник е на Лигата на шампионите, а ја освои и Златната топка. Со Ајакс трипати беше шампион и трипати го освои Купот на Холандија.
Тој има и 58 настапи за репрезентацијата на Холандија, со 24 постигнати гола, а беше клучен дел од освојувањето на Европското првенство во 1988 година.
