Единствениот македонски учесник на Светското првенство во атлетика Јован Стојоски трката на 400 метри ја истрча за 47,92 секунди, што е точно за една секунда послабо време од неговиот личен рекорд кој го постави годинава.
Стојоски, кој живее и тренира во Белград, трчаше во третата група од квалификациите, во која се појави и американскиот државен шампион Фред Керли. Стојоски беше последен во таа група, што и не е изненадување бидејќи годинава само еден атлетичар од тоа друштво имаше пријавено послабо време.
Стојоски годинава беше шести на Европското првенство за атлетичари до 23 години, а годинава го постави и својот личен рекорд од 46,92 секунди, но очекувано, на првенството во Доха не успеа да се најде меѓу полуфиналистите. И со времето на неговиот рекорд, тој немаше да биде меѓу најдобрите кои се пласираа во следната фаза.
Вечерва на СП најинтересни ќе бидат финалните трки на 200 и 800 метри за мажи, а кај жените финална дисциплина е фрлање копје.
