Атлетико Мадрид го официјализира ангажманот на Аксел Вицел. Белгискиот репрезентативец пристигна како слободен играч по четири изминати години во дресот на Борусија Дортмунд.
Вицел потпиша едногодишен договор со Јорганџиите и е прво летно засилување. Ривалите Реал Мадрид и Барселона досега беа поактивни од Атлетико на пазарот, но Диего Симеоне е среќен што доби искусен играч со над 600 натпревари во својата кариера.
Вицел е роден победник и токму таков фудбалер му треба на Ел Чоло. Освојуваше трофеи во сите клубови за коишто играше. Пет во дресот на Стандард Лиеж, куп со Бенфика, четири пехари со Зенит, како и два трофеи во Купот и Суперкупот на Германија со Дортмунд.
