Уште тројца работници на градилиштата во Катар каде се прават стадиони за фудбалскиот Мундијал во 2022 година, се заразени со коронавирусот, па заедно со претходните петмина, сега бројката е осум, соопштија организаторите на СП 2022.
Во Катар каде се затворени џамиите, училиштата, парковите и рестораните, потврдени се над 4.000 случаи на заразени со Ковид-19, седум луѓе се починати, а првите заразени на градилиштата се откриени во средата. Засега има заразени на три од седумте градилишта каде во тек е изградба на објекти за фудбалското СП кои треба да се игра по две години.
На заразените работници и понатаму ќе им се исплаќа плата, а ќе им биде платено и лечењето. СП во Катар треба да се одржи во ноември и декември 2022 година, и засега нема најави дека може да има одложување и некое поместување на термините. Сепак, има неофицијални информации дека ако Катарците не бидат подготвени навреме, Мундијалот може да се игра во САД.
