Кошаркарите на Кожув ја завршија сезоната во Суперлигата со победа, откако во последниот натпревар од плејофот го совладаа лидерот ТФТ Скопје со убедливи 91-79.
Иако дуелот немаше резултатско значење за двете екипи, ТФТ веќе го имаше обезбедено првото место, а Кожув беше без шанси за пласман во полуфинале, натпреварот понуди квалитетна кошарка и високо темпо.
Гевгеличани отворија одлично и одиграа импресивна прва четвртина, веројатно една од најдобрите во плеј-офот, во која постигнаа 31 поен и стекнаа предност од 31-25. Во втората четвртина ТФТ се консолидираше, па на паркетот во салата „26 април“ се водеше израмнета борба која заврши 24-24, за полувреме од 55-49.
Во тој период кај ТФТ блескаа Ташовски со 18 и Стојанов со 15 поени, додека кај Кожув двоцифрени беа Родни Пурвис со 12 и Бојчев со 10 поени.
По паузата, Кожув повторно ја презеде контролата и беше подобар противник во третата четвртина, а во последниот период рутински ја одржа стекнатата предност и заслужено стигна до победа од 91-79.
Кај победничкиот тим најпрецизни беа Бојчев со 16 и Василевски со 15 поени, додека кај ТФТ се истакнаа Ташовски со 24, Стојанов со 19 и Стојановски со 17 поени.
Во полуфиналето ТФТ Скопје ќе се соочи со Маџари, додека МЗТ Скопје ќе игра против Пелистер од Битола.
