Леброн Џејмс го одигра најдобриот меч во дресот на Лос Анџелес лејкерс, откако даде 44 поени, а имаше и 10 скока и 9 асистенции во победата над Портланд од 126:117 во НБА-лигата. ЗА Лејкерс ова е четврта победа во низа и сега тимот е меѓу посакуваните осум екипи во Западната конференција. Домашните навивачи беа воодушевени од играта на првата ѕвезда во тимот и го наградија со скандирање „МВП, МВП“.
На овој меч, Леброн стигна до петтата позиција на најдобри стрелци во историјата на НБА-лигата. Тој успеа да го помине легендарниот Вилт Чемберлен и сега има 31.425 поени во кариерата.
Пред Леброн, сега остануваат само четворица. Мајкл Џордан има 32.292 поени, Коби Брајант е со 33.643 поени, Карл Мелоун застана на 36.928 поени, а најдобар стрелец во историјата на НБА-лигата е Карим Абдул-Џабар со 38.387 поени во кариерата.
