Лионел Меси летово треба да го одигра неговото последно Светско првенство, а сигурно не многу потоа ќе дојде време кога аргентинскиот виртуоз ќе мора да стави крај на својата неверојатна играчка кариера. Според најавите, Меси и по завршување на играчката кариера ќе остане активен во фудбалот, а тоа го потврдува и фактот дека Аргентинецот купил свој клуб.
Повеќе светски медиуми, меѓу кои и реномираната „Марка“, објавија дека Меси го купил клубот Корнела. Се работи за каталонски клуб од предградието на Барселона, кој е формиран во 1951 година, а моментално се натпреварува во петтата лига по квалитет во Шпанија.
„Аргентинскиот фудбалер и осумкратен освојувач на Златната топка, Лионел Меси, го формализира купувањето на УЕ Корнела, со што стана нов сопственик на клубот“, се вели во соопштението за медиумите од клубот.
Само пред две сезони Корнела играше во третата лига, па првична цел со новиот газда ќе биде клубот повторно да се врати на нивото на кое играше до неодамна, односно пред две сезони.
Интересно е дека Корнела е клуб од кого потекнале многу големи ѕвезди, меѓу кои се и: Жорди Алба, Давид Раја, Герард Мартин, Кеите Балде, Чави Пуадо…
Меси е третиот фудбалер од легендарната генерација на Барселона што стана газда на свој клуб. Пред него, Жорди Алба го купи клубот Хоспиталет, а Жарарт Пике е сопственик на клубот Андора.
