Македонија денеска од 18 часот повторно ќе биде аутсајдер, барем според коефициентите во обложувалниците, во вториот меч на Светското првенство, прв за нас против Холандија на големите натпреварувања.
Влогот е голем и победа ни носи речиси сигурен пласман во вториот круг што беше и основна цел пред стартот на Светското првенство во Полска и Шведска.
Од 18 часот ќе играме без повредениот бек Томислав Јагуриновски, а во Краков веќе пристигна неговата замена Давид Савревски.
„Нормално е дека сум загрижен за повредата на Томислав и тој ќе ни недостасува. Савревски е дебитант, но секој е добредојден во ваква ситуација со силен ритам и турнирски систем на натпревари“ вели селекторот Кирил Лазаров.
И тој ја чека шансата за прва победа на Мундијалите како селектор, а треба да најде рецепт како да се сопрат одличните Холанѓани.
Лалињата во првото коло ја декласираа Аргентина со 29:19 и речиси имаат обезбеден настап во следната рунда, а Македонија по поразот од Норвешка со 27:39 допрва треба да се избори да биде меѓу трите селекции од вкупно четири што ќе одаат понатаму од Ф групата.
