Коронавирусот им донесе проблеми на македонските репрезентативци во снукер, кои за првпат играа на Европско првенство во Албуфеира, Португалија.
На дебито тројцата наши претставници Филип Нешкоски, Павле Данилов и Влатко Јанев не забележаа ниту една победа, но сега тоа е најмал проблем за нив и за судијката Ана Србиновска.
Нашата експедиција сега има проблем како да се врати дома поради затворените граници во Европа поради епидемијата со Коронавирусот.
„Огромен притисок и проблем за играчите, но и за одговорните лица на Снукер Асоцијацијата на С. Македонија направи и моменталната светска ситуација со пандемија од Коронавирусот. Откажани летови, откажани резервации и букирани карти, рестрикции со багажот и слично се само еден дел од компликациите кои произлегоа од пандемијата. Впрочем, целата ситуација стана многу сериозна и враќањето на нашите играчи и судијката Ана Србиновска (која е на првенството од самиот почеток од 6 март) доби приоритет и согласно сите препораки, се преземаат мерки за што поскоро тие да се вратат во нашата држава и во своите домови. Додека трае уште првенството, тие веќе патуваат и се надеваме дека согласно плановите и распоредот на превозот, тие веќе утре ќе бидат успешно пристигнати дома.
САСМ сака да испрати апел до сите наши надлежни институции и амбасади кои веќе се контактирани од Националната асоцијација, максимално да ни помогнат за безбедно враќање на нашите спортски амбасадори. Да сториме што е во наша моќ, првото нивно учество на Европско првенство да остане во поубаво сеќавање“, е апелот на раководните лица на нашата Снукер федерација за помош од македонските институции за безбедно враќање на снукер-експедицијата од ЕП во Португалија.