Кевин де Бројне ја одби првата понуда на Манчестер сити тешка 300 илјади евра неделно плус бонуси и засега не го продолжи договорот со популарните Граѓани.
Најдобриот играч во Премиер лигата според изборот за ланската сезона во Англија, очекува да биде во рангот на најплатените играчи во лигата, а тоа би значело и малку подобра понуда од неговиот сегашен тим.
Моментно најплатен во англиското првенство е голманот на Манчестер јунајтед Давид де Хеа со неделна плата од 400 илјади евра.
Зад него е Месут Озил, кој не игра за Арсенал, но си инкасира по 390 илјади евра неделно од касата на Топчиите. Иста плата има уште еден член на Арсенал, капитенот Пјер-Емерик Обамејанг, а пред Де Бројне според платата се и Кај Хаверц и Тимо Вернер со по 350 илјади евра неделно и уште неколку фудбалери што имаат неделна заработувачка над 300 илјади евра, колку што Сити ѝ нуди на својата прва ѕвезда во тимот.
Сепак, ова е само прва рунда на преговори, добро е за Сити што Де Бројне постојано истакнува дека сака да продолжи да игра за тимот од Манчестер, па се очекува нов сет преговори во јануари.