Даниел Алвес, капитенот на бразилската репрезентација, покажа дека уште може да игра на врвно ниво. Алвес ги предводеше Кариоките до титулата на Копа Америка, а токму тој беше прогласен за најкорисен играч на шампионатот. За ветеранот ова беше 40-та титула во кариерата, нешто што досега никогаш не му успеало на ниту еден друг фудбалер. Едноставно, нема потрофеен играч од него.
Алвес моментно е слободен играч и чека добра понуда за тоа каде би можело да ја продолжи кариерата. Бразилецот си замина од Пари Сен Жермен, а според пишувањата, негов следен клуб може да биде Манчестер сити. Англискиот првак сигурно ќе има корист од толку искусен и трофеен фудбалер.
Дополнителна предност е тоа што Алвес одлично се познава со менаџерот на „граѓаните“, Пеп Гвардиола, со кого заедно работеа во Барселона. Минатата сезона, бекот одигра 34 меча и даде три гола за ПСЖ. Сити нема да треба да даде ни едно евро за да го купи Алвес, а единствено останува само да ги договорат личните услови за да биде комплетиран трансферот.