Милан донесе одлука да не ја активира откупната клаузула за Никлас Фулкруг, па германскиот напаѓач по крајот на сезоната ќе се врати во Вест хем.
Фулкруг пристигна во јануари како привремено решение поради проблемите со повреди во нападот на Росонерите, но не успеа да ги оправда очекувањата. Повредата на стапалото дополнително го оттурна од посакуваната форма, па неговиот ефект од само еден гол на 14 натпревари не беше доволен за да го убеди клубот да го задржи.
Според италијанските медиуми, Милан од самиот почеток ја гледал оваа зделка како краткорочно решение, а опцијата за откуп била условена со значително подобар придонес на теренот. Иако клаузулата изнесува скромни 5 милиони евра, раководството решило да не ја искористи.
Во меѓувреме, клубот веќе им дал задача на скаутите да пронајдат нов напаѓач со слични физички карактеристики за летниот преоден рок.
За Фулкруг, најреална опција во моментов е враќање во Лондон, иако не се исклучува во иднина повторно да се пресели во Германија, особено ако Шалке 04 избори пласман во Бундеслигата.
