Се чини дека Барселона веќе го започна најавениот ремонт во тимот, а прв кој ќе ги напушти редовите на шпанскиот првак е Иван Ракитиќ. Хрватот е блиску до постигнување на договор со Интер, а трансферот ќе изнесува 50 милиони евра. Оваа преселба претходно беше најавена од страна на италијанските медиуми во февруари, додека сега стигна потврда и од реномираниот „Мундо депортиво“.
Тоа значи дека Интер летово ќе доведе најмалку две засилувања од Ла Лига, бидејќи претходно постигнаа договор со Диего Годин, капитенот на Атлетико Мадрид, кој на „Џузепе Меаца“ доаѓа како слободен агент. Ракитиќ е желба на „нероаѕурите“ веќе извесно време, тие и минатиот летен преоден рок се обидуваа да го наговорат да ја смени средината, а сега конечно ја остварија таа цел.
Се шпекулира дека Барселона одбила да му ја зголеми платата, иако неговиот договор е важечки до јуни 2021 година, што било само причина плус за Ракитиќ да се одлучи на ваков потег.
Одличниот хрватски играч за врска, во петте сезони во дресот на Каталонците четири пати ја освои титулата во Шпанија, а исто толку трофеи има од Купот на Кралот. Во сезоната 2015 Ракитиќ беше дел од тимот кој ја освои тројната круна коплетирајќи со европскиот пехар од Лигата на шампионите.
