На 8-ми декември 1991 година, белградска Црвена ѕвезда стана светски клупски првак, а по повод 33-годишнината од тој историски успех, клубот утре за време на мечот со Текстилац од српската Суперлига ќе има мала свеченост.
Македонските легенди Дарко Панчев и Илија Најдоски како едни од клучните фигури (Панчев постигна гол, а Најдоски беше капитен на Ѕвезда) во победата на Интерконтиненталниот куп во Токио од 3-0 против чилеански Коло Коло кој тогаш беше првак на Јужна Америка, се дел од видеото кое го објави Ѕвезда во кое неколкумина од таа генерација ги повикаа фановите да дојдат во што поголем број на стадионот „Рајко Митиќ“.
Инаку, утре пред мечот на Ѕвезда со Текстилац, пред најголемиот стадион во Србија ќе биде откриен споменик на славниот Драгослав Шекуларац кој беше роден во Штип, а на покана за присуство на настанот доби и некогашниот фудбалски судија, штипјанецот Ванчо Коцев.
