Поранешниот напаѓач на Барселона, Серхио Агуеро, покрена судски спор против „каталонците“ поради долг од три милиони евра. Желбата на фудбалерот беше да игра заедно со Лео Меси, па во 2021-вата направи трансфер од Манчестер сити во Барселона, но во текот на сезоната му беа дијагностицирани проблеми со срцето и тука беше крајот на неговата кариера.
Иако имаше договор на две сезони со Барселона, сепак постигнаа договор да му биде исплатена само првата сезона, а „каталонците“ планираа тие три милиони евра да ги покријат од осигурувањето кое го имаат фудбалерите. Сепак, осигурувањето одби да го плати тоа, обвинувајќи го фудбалерот и неговиот менаџер дека знаеле за срцевите проблеми и не го известиле клубот кога потпишале, нешто што категорично беше негирано.
Сега Агуеро се обидува да ја „седне“ Барселона на маса и да се договорат, па затоа е покренат судски спор, а целта е вонсудски да се договорат. Фудбалерот е подготвен да прифат и исплата на рати, со што парите би ги добивал во рок од пет години.