Македонскиот ракометен шампион Еурофарм Пелистер денеска и официјално го промовираше Лино Червар за нов шеф на стручниот штаб. Искусниот хрватски стратег потпиша соработка со битолскиот клуб во траење од две години.
Од таборот на Зелено-белите потврдија дека ангажманот на Червар е дел од долгорочниот план за зацврстување на позициите на клубот и остварување на високите амбиции на меѓународната и домашната сцена.
„Еурофарм Пелистер е клуб со највисоки амбиции. Изборот на Лино Червар за нов предводник претставува чекор кон дополнително надградување на нашиот проект и продолжување на успесите кои ги нижевме изминатите години“, стои во официјалното соопштение на клубот.
Лино Червар е едно од најзвучните тренерски имиња во светот на ракометот. Во својата богата и трофејна кариера тој ги предводеше репрезентациите на Хрватска, Италија и Македонија, а на клупски план работеше во екипите на Загреб и Металург.
Најголемите успеси ги постигна со хрватската репрезентација, со која се закити со златни медали на Олимписките игри и на Светските првенства.
За македонската спортска јавност, Червар е добро познато лице. Тој остави неизбришлив печат предводејќи го тимот на Металург во неговите најсјајни денови во Лигата на шампионите, а истовремено работеше и на афирмација на голем број млади македонски ракометари кои денес се носители на националната игра.
Со доаѓањето во Битола, се очекува Червар да донесе нова енергија и стратешко искуство кои ќе му помогнат на Еурофарм Пелистер да направи чекор напред во европските натпреварувања.
